Na note par parlar Talian e (re)vìver la stòria

Ntel ùltimo sabo, di 23, gà acontessesto la 12ª Note de Ciàcole. Sta festa taliana l’é promovesta tuti i ani par la Associassion dei Amighi del Museo e Archivo Stòrico Piero Rossi (AAMAHPR). Come la é na “festa andarina”, cada ano la é fata nte na capela diferente. Sto ano la comunità de San Pedro (San Cristòvon) ga ricevesto depì de 300 persone con vóia de parlar Talian e mantegner viva la nostra cultura e la nostra stòria.
Come sempre se fà par scumissiar, i Amighi del Museo i ga representà le fameie che ndea filò co i ciareti e ferài in man, intanto che se declamea e cantea la “Mèrica, Mèrica” - el Ino de la Imigrassion Taliana ntel Rio Grande do Sul, composta par Angelo Giusti, nostro poeta de Noa Trento (Flores da Cunha). Un recognossimento a tuti i noni e bisnoni che tanto i ga tribulà par che noantri ncoi se gavesse la “cucagna”.
Dopo de la abertura, la sena. Maria Vèrgine che magnaron! Tortèi, polastro, porco, maionese, salata, pan, vin, gasosa e cafè con biscoti... Robe de crepar la pansa! Dopo del magnar gà scumissià i “diferensiai” de la Note de Ciàcole. La rifa, sinque sèrie sortiade nte la roda de la fortuna, con i mèio prémii che ghin podaria èsser: na dùsia de ovi de colònia, un garrafon de vin, na torta, na sesta de produti coloniai e un salame de metro!
Anca no podaria mancar el giugo del sindicato (de le argole) e anca el giugo dei cavaleti, che i ga dassà tute le fameie contente co i premii. E durante tuta la note ghemo bio animassion musical con Gisele e Nilso, che i ga fato tuti balar co le bele mùsiche taliane e altre del so repertòrio.
Come ghemo dito: la Note de Ciàcole la é na “festa andarina”. Par quela, se qualche capela ga caro de ricever sto evento, feghe saver ai sòcii de la Associassion dei Amighi del Museo. E par fenirla, bisogna ringrassiar e inlodar tuti che i ga giutà a far de la 12ª Note de Ciàcole un sussesso! Sìpie nte la organisassion, laorando, con patrossìnio de qualcossa o come partissipante: tuti i mèrita auguri! Fin el ano che vien, se Dio vol!

Ciàcole

Barufe e Sbrontolae

Sti giorni indrio mi zera drio pensar sora quante barufe e sbrontolae che se sentia e ancora se sente in colònia par via de robete come:
– Ciò, fémena, gheto visto che el visigno el ga scambià el palanco dela divisa de posto? Lo ga impiantà diese sentìmetri rento ntela nostra tera. Vao ciamar el agrimensor e dopo vao ntela giutìssia. No vui gnanca savérghene.
– Come che te vien rento cole sinele sporche, bruto lasaron?! Go pena finio de netar la cosina...
– Te sè ghe geri son ndà iutarghe el me visigno a copar el porco. El me ga dato gnanca un toco de carne. Mi spetea che el me desse al manco un dusento eti de grépole. Ciucia qua! Ma varda che el ze un man de vaca, èh...
– Ciò, fémena, se el visigno el vien ancora dimandar imprìstio de feramente, dighe de nò, parché ze belche due volte che el me dimanda imprìstio de robe e dopo el se desméntega de portarle indrio. 
– Come che el visigno novo el ghe mete tanto de portar la “capelinha”? Sarà che el pensa de restar cola “capelinha” tuta la stimana?
– Signor benedeto, Arside, sito mia bon de parlarghe a Arciso che le so galine la sempre rento ntel nostro orto? Se la va cossita, de qua un paro de de giorni ghe tiro el col. Dopo che no i vegne lamentarse.
– Come che la festa dela ciesa, sto ano, la ga dato poco lucro cossita?
– Se no i scámbia mia i fabricieri, me cavo fora de sócio.
– oooh...sto ano, con tuta quela piova chez e vegnesto, mi cato che femo poco vin...
– Come che la patrola dela prefeitura ze belche tre mesi che no la passa qua ntel nostro travesson? Speta che nantro colpo ghe dao el voto, mi...
Ciò, negro, sito ndato onde sporcar le braghe de quela maneira li? Mi cato che gnanca cola soda non son bona de netarle...
– Varda, negra, no stà pi parlar de polìtica qua casa. No vui pi savérghene. E pò, de sento polìtichi te ghin cati un de bon, e de dusento, gnanca un.
– Te gavea dito mi, negro, che no l’era par comprar el trator in società che la vegnea fora cossita: un giorno el ga peneo sbuso, nantro giorno ghe manca oio, nantro di se spaca la coreia del motor e quando el te ocorre, no l’è mai a disposission...